Inthlan nía zawm tur tichhuak

Serchhip DC Kumar Abhishek chuan, August 27, 2020-a village council inthlan turah State Election Commission-in order a tihchhuah tawh behchhanin, inthlan nía an district-a zawm tur kaihhruaina nimin khan a tichhuak.

Polling station: Pol­ling station leh a chheh­velah ṭum khatah mi 50 aia tam an pung khawm tur a ni lo. Thupek kengkawh a, rua­hmanna siam turin khaw tina VTF, NGO leh MPF beisei an ni. Vote in­thlak chhâwk dan tur ruahmanna a remchan dan angin, house number indawt dan emaw, veng thlêr angin emaw, YMA branch/section milin darkar bithliah siam a, vote inthlak chhâwk dan tur rua­hman tur a ni.

Physical distancing (ft. 6 dana awm) zawm reng tur a ni a, MPF/NGO/security/medical duty-te pawhin hei hi an zâwm tur a ni. Polling station leh a chhehvelah chil chhâk phal a ni lo a, khuh dawnin rawmawl hmanga hmui hup tur a ni a, mask vuah tur a ni bawk.

Polling booth: Vote thlâk turte'n ft. 6-a inhlata din tur a ni a, chhinchhiahna siamah chauh an intlar tur a ni. Luhna leh chhuahna hran siamte dik taka zawm tur a ni a, vote thlak turte inziah luhna tura dah register-ah hming leh phone number ziah luhtir vek tur a ni. Register-a hming ziah luh hi VTF-te kutken tura beisei a ni. Mask vuah lote chu vote thlak phalsak an ni lo ang. Polling official, candidate leh an agent-te bakah phalna neia polling booth-a lutte'n mask vuah vek tur. Polling booth-a lut zawng zawngin hand sanitiser chhawp an hmang zel tur a ni. Kum upa leh tar chak lo, nu nau pawm leh rualbanlo (PwD) te, damlo bawrhsáwm deuhte chu intlartir loin, vote thlaktir nghal tur a ni. 

Counting hall: Vote chhiarna hmunah candidate leh election agent/counting agent-te bâk chu counting official-te chauh awm phal a ni. Zan dar 8:30 aṭanga zing dar 4:30 inkara páwn chhuah khap/curfew a nih avangin, hemi hun chhung hian a chunga tarlan phalna nei bak chu awm phal a ni lo. Counting hall chhehvelah vote chhiar ngaithla turin punkhawm phal a ni lo. Result hi tlangau/public address system hmanga puan tur a ni.

Mobile phone: In­thlanna buatsaihtu leh police duty-te bakin pol­ling booth leh counting hall chhungah mobile phone ken luh phal a ni lo. Anni pawhin silent mode-ah an dah tur a ni.

Meizûk: Polling station huam chhung leh counting hall chhungah meizûk khap tlat a ni a, hei hian inthlan buatsaihtu leh duty zawng zawng a huam vek.