Niminah mi 162 sample endik

Zoram Medical College (ZMC) Covid-19 Laboratory-ah nimin khan mi 162-te swab sample endik a ni a, nizan khan result chhuak tura beisei niin, result kan hre hman lo. Hetih lai hian, May 27, Ningania swab sample endik mi 15-te chuan Covid-19 hripui an vei lo tih hmuh a ni.

State Referral Hospital (SRH)-ah Ningani zan khan rinhlelh thilah lung (heart) ṭha lo vanga damlo pakhat dah luh a ni a, Make Shift ICU-ah dah a ni. Nimin khan hripui kai rinhlelh thilah mi pakhat dah luh leh niin, Risk Ward-ah dah a ni a; kal (kidney) lam ṭha lo a nih avangin dialysis tihsak a ni. Ningani zan leh nimina SRH-a dah luh tharte chu nimin khan an swab sample lâk a ni a, vawiinah endik a ni ang.

Heti hian SRH-ah hian mi pasarih an awm mek a, Risk Ward leh Make Shift ICU/SARI Ward-ah pakhat ve ve, Holding Ward-ah panga dah an ni.

Ningani tlai dar 5 leh nimin tlai dar 5 inkarah Mizoram luhka hrang hranga screening point-ah mi 1,085 enfiah an ni a, rapid antibody test (RAT) hmanga endik mi 403 an awm.