Minister-in a bialah ṭanpuina a pe

Minister of state Lalchhandama Ralte chuan, a bial Tuivawl consti­tuency-a khaw ṭhenkhatah Covid-19 vei hmuh chhuah a nih avang leh mipui harsatna leh thlaphànnate hre chiang turin August 17, Thawhṭanni khan a biala khaw ṭhenkhat a tlawh a; ṭanpuina eng emaw zat a pe.

Lalchhandama Ralte hian Thawhṭanni chhun leh zan khan Kepràn, Sàwleng leh Darlawn khuate tlawhin, khawtlang leh kohhran hruaitu, village task force hruaitute nen hmalak zel dan tur an sawi a; "Hripui lêngin kan bial chhunga khaw ṭhenkhat a luhchhuah ve ta a, ka bial mipuite in mangang tih ka hria a, mihring lama thil ṭha lo thleng theite hre rengin, eng pawh tawh huamin ka bial mipui kianga awm turin ka rawn kal a ni," a ti.

Pathian chakna ring tlat tura a bial mipui chahin Lalchhandama chuan, "Mizoram sorkar pawhin Tuivawl bial mipuite tan a tih theih tâwk a chhuah zel dawn a ni," a ti a; sorkarin himna tura inkaihhruaina a siamte chu zâwm zel turin mipui a ngen. Lalchhandama Ralte hian Kepràn, Sawleng, North Serzawl leh Darlawn khuaah chhung tin hnena sem tur kut sil faina (hand sanitiser) bûr 2,000 a pe a; hmai tuamna, kutkawr, PPE kit leh vantlang hmun phuh faina tur damdawi eng emaw zat a hlan bakah, inkhàrkhip vanga chhuanchham an awm palha sem turin buhfai ṭhahnem tak task force-te hnenah a hlân bawk.