Vaimim eitu pangang chi khat Fall armyworm a puang mek

Vaimim eitu pangang chi khat, fall armyworm chu tunlai hian Mizoram hmun eng emaw zatah a puang leh a, lo neitu tam takin harsatna an tawh phah. Agriculture department hotute chuan, fall armyworm chung­changah nikum aiin an in­buat­saih ṭhat thu an sawi.

Agriculture secretary Lalhmingthanga chuan Vanglaini palai zawhna chhangin, inbuatsaihna an neih ṭhat avangin harsatna lian tham a thlen tawh loh a rin thu a sawi a, "He thil hian min chàmchilh niin a lang ta ber. Nikum khan kan inbuatsaih hman loh bakah, kan vawi khat hriatna a nih avangin kan buai viau. Tunah chuan training kan neih tawh avang leh damdawi kan neih ṭhat avangin nikum ang em em kha chuan kan buai tawh lo ang," a ti a; damdawi leh pangang a manna thangte pawh district hrang hranga Agriculture officer (DAO)-te'n eng emaw zat an kawl mek thu a sawi.

Farmer's Helpline-a duty-te chuan, fall army­worm vanga harsatna tâwk betu eng emaw zat an dawn thu an sawi a, tun hnaia helpline kaltlanga pangang vanga harsatna tâwk in report zingah Aizawla veng ṭhenkhat Durtlang, Republic Veng­thlang (Melriata leipui nei), Chanmari West (Eden­thar Venga leipui nei), Seling (Tuikhurhlu) leh Bualpui-V aṭangtein a nih thu helpline viltute chuan an sawi. District dang­­ah pawh DAO hnena inhriattir an awm nual bawk.

Nikum khan Mizoram pumah fall armyworm vangin chhungkaw 9,307-in harsatna an tâwk a, a do nan cheng nuai 58 chuang sèn a ni a; Mizoramin vaimim a thar ṭhin pawh metric ton 1,831 velin a tlahniama hriat a ni.