Bru-te chungchanga inremna ziahah Pawl hrang hrangin lawmthu an sawi

Mizoram aṭanga tlân chhuak Bru, Tripura transit camp-a la awmte Tripura-a an awm hlenna tura January 16, Ni­ngania New Delhi-a inremna (agreement) ziah a nih chungchangah Mizorama tlawmngai pawl leh political party hrang hrangte'n nimin khan thuchhuah an siam a, lawmawm an tih thu an tarlang.

Central YMA chuan, "Tripura transit camp-a Tuikuk awmte, hun rei tak Ministry of Home Affairs (MHA) leh Mizoram sorkarin hruai haw a tum pawha haw duh lo te, NGO hrang hrang pawhin lawm taka dawnsawn kan lo tum lai leh sorkar aṭanga hamṭhatna tam tak an tiam chunga kawhmawh báwl tlata lo kîr duh lo te, Union Home Minister hoa Tripura-a awm hlen tura tih an lo ni ta hi CYMA chuan lawmawm a ti tak zet. Mizoram sorkar leh MHA chungah lawmthu a sawi tak meuh a ni," an ti.

CYMA chuan, "Tripura-a an awm ngheh dawn tâk avangin, Mizoram electoral roll-a chuangte pawh paih an ni tur hi a lawmawm kan ti leh zual a, CYMA chuan thuneitute chungah lawm­thu a sawi a ni," an ti a; ṭhahnemngai taka YMA sub-headquarters, group leh branch hmalaknaah te, Mizo mipui dawhtheihna leh ṭhahnemngaihnaah lawmthu an sawi bawk.

MZP chuan thuchhuah siamin, "Insawi­ṭhaih vang leh an duh thu ngeia Mizoram chhuahsantu Tuikuk chungchangah inremna ziah a ni a, a hmáwrbâwk a nih tâk vangin MZP chu Mizoram sorkar chungah a lawm hle," an ti a; inremna neih a nih theih nana hma latu Mizoram sorkar, sorkar laipui leh Tripura sorkar chungah an lawm thu an tarlang.

MZP chuan, Bru-te chu an duh­thlanna ngeia Mizoram chhuahsan an nih thu leh hun rei tak Mizorama hruai kîr tum ni mah se, Mizorama an let duh loh thu an sawi a; Mizoram khua leh tui Bru-te chu remna leh muanna vawng nungtu ni tura sáwmin, "July 3, 2018-a inremna neih a nih anga Mizorama rawn lêt leh chhungkaw 328-a mi 1,369-te hi MZP chuan an awmna hmunah ṭha taka awm tur leh a ram neitu Mizote zah thiam a, an zài ngai thiam turin a chah a ni," an ti.

Mizorama rorel lai MNF party chuan, Tripura-a camp hrang hranga Bru-te Tripura-a an awm hlen dawn avangin an lawm thu sawiin, inremna ziah a ni chu Mizo hnam tan thil lawm­awm leh chhinchhiahtlak a tlin thu leh, MNF sorkar lai ngeia chinfel a ni chu lawmawm an tih thu an tarlang.

MNF chuan, Bru-te chu ráltlan anga inchhála camp-a an awm chhungin Mizoramin kawng hrang hrangin harsatna a lo tâwk tawh tih sawiin, "Tlawmngai pawlte leh mipui pawhin he harsatna hi tàwp tawh se an duh a. Chuvangin, Mizorama kirtir loa Tripura-a an awmna tura January 16-a agreement an ziak ta hi a lawmawm. He agreement hi tihhlawhtlin a nih ngei pawh kan beisei tlat a ni," an ti.

Camp-a awm Bru-te Tripura-a an awm hlen theihna tura Mizoram sorkar hmalaknaah an lawm thu sawiin MNF chuan, sorkar hruaitu te, Home department hmalakna te, NGO Coordination Committee hmalaknate leh mipuiin an thlàwpnaah te, Mizo mipui ṭanrualnaah an lawm thu an tarlang.

Bru lâk lêt buaipuitu Joint Monitoring Group-te September 6, 2019-a New Delhi-a an ṭhutkhawm dawnah Mizoram sorkarin Bru hruai kîr chu vawi khat bak neih tawh loh ni se, tia rorel a nih theih nan theihtawp chhuah ni se, an tih thu sawiin MNF chuan, "Mizoram sorkarin he rorel hi a din tlang theih nan theihtawp a chhuahzui a, chief minister Pu Zoramthanga'n Union Home Minister hnena a sawi ṭhin bakah, Tuikukte din­hmun sawifiahin ziakin rawtna felfai tak

November 21, 2019 khan a pe a ni," an ti.

Mizoram Pradesh Congress Committee (MPCC) chuan, Tripura transit camp-a Bru-te Tripura-a an awm hlen theihna tura inremna siam a ni chu lawmawm an tih thu an sawi a, "Kum 20 chuang Tripura-a Bru awmte lâk lêt tuma Central sorkar, Mizoram sorkar leh Tripura sorkarte buaina chinfel a ni ta hi a lawmawm tak zet," tiin an tarlang.

MPCC chuan, Bru-te chu Tripura aṭanga Mizorama pêm lut, inthlah pung ta an nih avangin Mizorama kîr tawh loa an duh thu ngeia an pêmna Tripura-a an awm hlen theih nan Congress sorkar laiin rawtna siam a ni fo tawh tih an sawi a, "Central sorkar official-te kaihhruaia meeting-ah he thu hi sawi a ni fo tawh. Khatih laia Tripura sorkar khan Tripura-a Bru mipui awm hlentir tura Mizoram sorkar rawtna chu an pawm thei tlat lo. Mizoram sorkar rawtna kal zel anga Tripura sorkarin ngaihdan thlak a, Bru mi 30,000 chuang Tripura-a awm hlentir an remti ta hi a lawmawm tak zet a ni," an ti.

Congress party chuan, Bru chung­changa inremna chu MNF party-in an thawh chhuah anga lantir an tum nia sawiin, "Mahni an infak chiam mai hi a âwm lo a, mipui rilru hruaisual tumnaah kan ngai," an ti a; inremna chu Tripura sorkarin a rilru a thlak tak avang leh Mizorama NGO hrang hrangte'n awmze nei taka Central sorkar hotute an karna rah chhuah a nih thu an tarlang.

MPC party chuan, November 30, 2019 hnua Tripura camp-a la awm Bru-te Tripura-a awm zui tura ruahmanna Mizoram sorkarin a nei ta chu lawm­awm an tih thu tarlangin, "Mizorama lo kîr, Mizoram khua leh tui nihna chan zui zel duhte hi uluk taka ngaihtuah a, an hmakhua thlirpui turin Mizoram sorkar kan beisei," an ti.

MNF party ṭhalaite pawhin thu­chhuah siamin, "Kum 20 chuang Tuikukte vanga Mizoramin harsatna kan tawh chu chief minister Pu Zoramthanga hmalakna avang te, tlawmngai pawl hrang hrangte leh Mizo mipuite thawhhona avanga sutkian a ni ta hi lawmawm kan ti tak zet a, a bik takin CM Pu Zoramthanga kan chhuang hle a ni," an ti a; January 16, 2020 chu Mizote chanchinah hriat reng a nih tawh dawn thu an tarlang.