Hnahthial DTF hmalakna tur an rêl

Hnahthial District Task Force (DTF) chu nimin khan an chairman Vanlalmawia, district bawrhsap hoin DC confe­rence hall-ah an ṭhukhawm a, hmalakna tur hrang hrang an rél. An district-ah Covid-19 vei pahnih an awm mek thu leh an dinhmun a hlauthawnawm loh thu tarlan a ni.

Vanlalmawia chuan, hun eng emaw chen chu Mizorama Covid-19 vei awm lohna district awmchhun an nih thu sawiin, "Tunah erawh pahnih kan nei a, damdawi lam thiamte'n sorkar ruahman angin an enkawl mek. Kan fimkhur zual zel a ṭul a, mask vuah, kut silfai ngun leh social distancing kan kalpui ṭhat a ṭul a, sorkar thupek leh rua­­hmannate kan zawm a pawi­mawh hle a ni," a ti a; district task force-in theihtawp chhuah­in hma an lâk reng thu a sawi.

Hnahthial SP Lalbiakkila chuan, venhimna lama an hmalaknate sawiin, "Kan district chhunga Myanmar nena inkalpawhna hrang hrang March 2020 aṭanga khar chu August 8 aṭangin tihtawp a ni. Bungkhawkaiah erawh chuan police an la duty zui zel. Mizoram (Containment and Prevention of Covid-19) Ordinance, 2020 bawhchhia mi 562 chu pawisa chawitir an ni a, an pawisa chawi tlingkhawm chu Rs. 60,000 chuang a ni," a ti.

DTF member secretary Dr Lalrengpuii Ralte sawi danin, Hnahthiala sorkar quarantine facility-a awmte swab sample lâk ZMC-a thawnte chu August 17 zanah result a chhuak a; company-a thawk hnam dang pakhat, Assam aṭanga rawn lutin hripui a vei tih hmuh chhuah niin, Covid Care Centre-ah dah luh a ni.

Hnahthial DTF chuan, Bungkhawkai border-a duty police-te ṭanpui nan Rs. 10,000 pek te, KVK Farmer Hostel chu CCC atan hman te, Inrinni zing bazarna hmun atan MRB aṭanga HBSC Playground tawp thleng foothpath hman te, sorkar thupek chhiatni ṭhatni inkaihhruaina chu Hnahthial Group YMA-in an hnuaia YMA branch tinah pe vek se tihte leh, vegetable supply change chu Horticulture officer kaihhruai­nain VTF-te nen ruahmanna siam ni se, tihte an rél a ni.