A ṭha apiang kan zui ang a, tihdanglam ngai chu kan tidanglam ang - IPR Minister
Information and Public Relations (IPR) minister Dr Vanlalthlana chuan, sorkarah kalphung awm sa a ṭha apiang an zui ang a, a ṭha lote erawh chu an tihdanglam dawn thu a sawi.
IPR department chuan nimin khan an directorate auditorium-ah IPR officer-te leh chanchinbumite kum thar puala thingpui inhona hun an buatsaih a, IPR Minister-in a hmanpui. Minister chuan, "Kalphung thar, mipui sorkar kan ti a, tuna kalphung kan neihte a ṭha apiang kan zui ang a, tihdanglam ngai erawh chu kan tidanglam ang... Mizoram siamṭhat kan tum a nih chuan kut hrang hrang kan thawh tlàn a ngai. Thu dik chinah chuan min rawn bei ang a, kan insiamṭha ang," a ti.
Dr Vanlalthlana chuan, media-te chu mipui ngaihdan hruaitu an nih thu sawiin, "Mipui ngaihdan siamtu, kaihruaitu, hruai sual theitu kan ni a, kan thu azirin a ṭha lam leh ṭha lo lamah kan kal thei. Mipui ngaihdan leh ram siamṭha zawka kal a ṭul," a ti a, media war a nasat avangin ṭan thar reng a ṭul thu a sawi.
Chanchinbumite chu thil dik lo chhui chhuahna lam (investigative journalism) ti tam tura chahin, "Thil hâi chhuahah kan ṭan a ngai a, keimahni'n kan kheuh chhuah ngai tam tak a awm. Sorkar véngtu in ni a, vèn ngai kan ni. Min véng theitu ber chu media in ni. I ṭang tlâng ang u, hlap kan ngaihnaah chuan min rawn hlap rawh u," a ti a; RTI Act hmang ṭangkai lehzual tur leh journalism chu ram siamṭhatna hmanruaa hmang turin chanchinbumite a chah.
IPR Minister chuan, Mizoramah print media leh electronic media te, journalist-te an lái (neutral) ṭha hlea a hriat thu sawiin, "Ṭan záwngte kan nei ṭhin a, mahse, kan thuchhuahah chuan kan neutral viauin ka hria. Hetiang hian i kal zel ang u," a ti.
Inkhawmah hian MJA General Headquarters president C Lalrambuatsaiha pawhin thu sawiin, sorkar lam aṭanga chanchinbumite tihhmasawnna lam hawi thil chi hrang hrang a tarlang a; sorkar hmalakna mipui hnena puanzar kawngah theihtawp chhuah an inhuam thu sawiin, ram leh mipui rawngbawlnaah sorkar tana an ṭangkainate hriaa hman ṭangkai tum turin a sáwm.
Inkhawm kaihruaitu IPR director C Lalnunkima chuan, IPR Minister thar kaihhruaina hnuaiah hmasawnna rahbi thar duhawm tak hmuh ngei a beisei thu a sawi bawk.