CM leh Nagaland Dy CM an inkâwm

Chief minister Lalduhoma leh Nagaland deputy chief minister Y Patton chu January 8, Thawhṭanni khan CM Banglaah an inkâwm. Y Patton chuan, Mizote ang thoin Naga mipuite'n India leh Myanmar ramri hung an duh loh thu a sawi.

Nagaland Deputy Chief Minister chuan, Myanmar leh India ramri hung chu Naga mipui tan pawm theih a nih loh thu a sawi a, "Naga mipui zatve deuh thaw hi Myanmar ramah an chêng a, tuna kan ramri hman mek kâna in leh lo sa, an chenna in pindan ṭhenkhat India lama awm a, a pindan dang ṭhenkhat Myanmar lama awmte pawh kan nei. Mizote dinhmun leh kan dinhmun hi thuhmun reng a ni," a ti.

Mizoramah sorkar thar chak tak a siam avanga a lawmpui thu Lalduhoma hrilhin, Nagaland-a zin turin Y Patton chuan a sáwm a, "Naga leh Mizo te hi thlahtute aṭanga unau leh inhnai tak kan niin a lang a, kan tan pawh CM i ni," a ti a; Nagaland-ah Mizo chief secretary pathum leh additional chief secretary pakhat an awm tawh thu a sawi.

CM Lalduhoma leh Y Patton te hian hmarchhak state-te hmasawn zelna tura hmalakna tur pawimawh nia an hriat te, a ṭul anga thawhho dan tur te, tun hnaia CM Lalduhoma'n Delhi a tlawh chungchangte leh thil pawimawh dangte an sawi dun a; Y Patton hian Lalduhoma hnenah Naga hnam thuam, an pasalṭhate ralthuam leh incheinate a hlan a ni.