Tourism tihhmasawn dan tur sawiho
Aizawl district bawrhsap Nazuk Kumar kaihhruaiin nimin khan a pisaah tourism tihhmasawnna tur scheme, Swadesh Darshan 2.0 hnuaia Destination Management Committee an ṭhukhawm a, Aizawl leh a chhehvela tourism tihhmasawn dan tur an ngaihtuah.
Ṭhutkhawmah hian Destination Management Committee hnuaia hmalakna - marketing & promotion, skilling & capacity building, IT & digitization, investment & public private partnership leh sustainability/travel for LiFE chungchangte sawiho a ni.
Egis Indian Consulting Engineers Pvt. Ltd.-in Aizawl chhehvela hmun pali - Durtlang Sakeikhawthlir, Melthum, Hmuifang leh Samlukhaiahte zin mite tan infrastructure hrang hrang siam dan tur ruahmanna an siam dawn tih sorkar thuchhuahin a tarlang.
Tourism tihhmasawn nan street painting, reels/short video siam, photography bakah best rural tourism village inelna buatsaih theih dan turte an sawiho bawk.
Swadesh Darshan 2.0 hnuaia sum hman turte chu sorkar laipuiin a tum vek a ni a, tourism industry tihhmasawnna tura sorkar laipui hmalakna a ni. A tum ber chu khualzin mite tlawh tlaka hmunhma buatsaih a ni a, plastic free tourist destination leh homestay tourism ngaih pawimawh a ni dawn.
Ṭhutkhawmah hian Tourism department, LESDE department, Police, Aizawl Municipal Corporation leh DRDO hotu te, Egis India Consulting Engineers, Association of Tour Operators leh Mizoram Hotel Owners Association aiawhte an tel a ni.