Chapchar Kût hman dan tur sawiho

Art & Culture minister C Lalsawivunga hoin nimin khan a pisaah Art & Culture department hotute'n kumina Chapchar Kût hman dan tur an sawiho. Rawtna an neihte chu Chief Minister kaihhruai Chapchar Kût Organising Committee pawmpui tura thlen a ni ang.

C Lalsawivunga chuan, Chapchar Kût chu Mizote kût zinga pawimawh leh ngaihven hlawh a nih thu sawiin, "Hnam ziaráng leh nunphungte chawi nun leh vawnhim nana hman ṭangkai a ṭul a, zau zawka khawvel hriat leh hmuh theih tura Mizo hnam ziarâng leh nunphungte pho chhuah a nih theih nan ṭan lâk tlàn a pawimawh," a ti.

Ṭhutkhawmah hian Chapchar Kût hman tawh ṭhin dante leh tlawmngai pawlte nena thawhhona an neih ṭhin dante tarlan a ni a; ngaihtuahna zau zawk sénga Chapchar Kut hman a nih theih dan tur te, senso ngai zat te, a hun chhung tur te, a hmunhma, hun hman dan turte an ngaihtuah a; food stall, exhibition stall, photo gallery/ art exhibition, flower show, Zokhua leh a kaihhnawih dangte an sawiho bawk.