Mizote'n Zampui tlanga Bru dah an duh lo CM Zorama'n Tripura CM hnenah a thlen

Mizoram aṭanga Bru tlân chhuak, Tripura refugee camp-a awmte an duh thlannaa Tripura awm hlen turte tan Tripura sorkarin Zampui tlangdungah khaw pathum din a tum a, Zampui tlangdunga Mizote'n duh loin an dodal. Hemi chungchangah hian chief minister Zoramthanga chuan Tripura Chief Minister hnenah lehkha thawnin, an thil tum ṭhulh turin a ngen.

Bru-te awmna tur hmun atana Zampui tlangdunga hmun ruahman en fel turin Kanchanpur District Magistrate hoin Tripura sorkar official leh Bru pawl hruaitute chu nimin khan an thawk chhuak a; chu chu duh loin Mizote chu an pung khawm ve nghal a ni.

Zampui tlangdunga Mizote an punkhawm avang hian Bru-te puala khaw dinna tur ram chu en fel theih a ni lo a; Kanchanpur SDM leh Mizo Convention hruaitute an inbiak hnuah, June 3, 2020-ah huam zau zawka inràwn khawmna buatsaih turin thutlukna an siam.

Hetih lai hian, CM Zoram­thanga chuan Tripura Chief Minister hnenah lehkha a thawn a; Mizoram aṭanga Tripura-a Bru awmte avangin Tripura-a Mizo khaw palite'n kum 1998-ah tun hma aṭanga an khua an chhuahsan tawh thu a sawi a, "Chuvangin, ruahmanna in lo neih tawh hi sûtin, hmun dang ngaihtuah turin ka ngen a che," a ti.