KHAWTHLIR

Tanpuina tur thawh

Mizoram Iskut Grower's Association hruaitute chuan nimin khan chief minister Lalduhoma hmuin, CM Relief Fund-ah Rs 10,000 an thawh a, "Keini kut hnathawka eizawngte tan innghahna tur sorkar thar kan nei ta hi kan lawm tak meuh a, kan lawmzia lantir nan kan theih tâwk beitham tak kan hlan a che," an ti.

VBSY buatsaih

Kolasib Gosen Veng leh New Builum khuaah nimin khan sorkar laipui scheme hrang hrang inzirtirna, Viksit Bharat Sankalp Yatra (VBSY) buatsaih a ni a, state prabhari officer V Hekali Zhimomi-in a telpui. VBSY hi Hnahthial district-a Hnahthial North-I, South-II leh South-III ahte nimin khan khâr a ni a, sorkar laipui scheme hrang hrang enkawltu department hotute, VC leh NGO aiawhte an tel bakah, medical check-up buatsaih a ni.

Lunglei HPC Vice Chairman

Lunglei district High Powered Committee (HPC) vice chairman atan V Malsawmtluanga, Lunglei North bialtu MLA ruat a ni. Lunglei HPC vice chairman tur hi Chief Minister thurâwn angin Governor-in a ruat a, minister of state tlukpui a ni ang.

CM an kâwm

Chief minister Lalduhoma chu nimin khan a pisaah Foundation for Drugs Free Mizoram hruaitute'n an kâwm. CM chuan an hmalaknate'n rah ṭha a chhuah a beisei thu a lo hrilh a, duhsakna a hlan. Foundation for Drugs Free Mizoram hian kum li chhungin sikul leh kohhran hrang hrang 66 an tlawh tawh a ni.

Heroin man

Excise & Narcotics department, Champhaia Customs Preventive Force leh Zokhawthara Land Customs Station-te thawkho chuan January 8, Thawhṭanni zan dar 6:30 khan Zokhawthar kawngah heroin gram 576.360 (hawng 50) leh a neitua puh mi pathum Kuthu (31) s/o Soehlaing, Zokhawmawi, Myanmar, Lalhruaitluanga (31) s/o Chuanvel, Hmawngkawn, Myanmar leh Zachinmawi (21) d/o Lalthanglian, Hmunlai, Myanmar nia inchhálte an man. Mi pathum lakah NDPS Act, 1985 tlawhchhanin thubuai ziah luh a ni.