KHAWTHLIR

Mizo zinga dam rei ber pawla ngaih Darrohnuni (kum 108) w/o Liankhum­a Khiangte, Kawrthah, Mamit district chu May 28, Ningani chawhnu dar 1:10 khan an inah a thi a, nimin khan bialtu pastor Rev. C Lalmalsawma'n a vui. Darrohnuni hi August 1, 1912-ah Thaidawrah a piang a, kum 1925-ah Kawrthahah an awm ṭan. Amah hi Mizo zinga dam rei berte zinga mi nia hriat a ni a, tu leh tuchhuan 41 a nei a; kum 2018 MLA inthlanah Mizorama hmeichhia vote thlaktu upa ber 'Oldest female voter' ah sorkarin ngaiin, certificate a hlân a ni.

Covid-19 vei leh vei rinhlelhte tan inenkawlna leh damdawi man atan PMJAY hman theih a ni tawh a, routine ward-ah ni khatah Rs. 900 leh Covid-19 veite tan routine ward-ah ni khatah Rs. 1,800 hman theih a ni a, HDU-ah ni khatah Rs. 2,700, ICU-ah (ventilator tel lo)  ni khatah Rs. 3,600 leh ICU-ah (ventilator nen) Rs. 4,500 hman theih a ni bawk.­

Former Legislators Association of Mizoram (FLAM) chuan nimin khan an member thi - F Saphleia leh J Lawmzual­a, Lunglei ve vete chu an in ve veah an rál a, minister C Lalrinsanga'n a telpui. F Saphleia hi kum 1989 khan Congress party ticket-in Lung­lei South bialah MLA atana thlan a ni a, March 7, 2020 khan kum 83 mi niin a thi. J Lawmzuala hi kum 1998 khan PC party ticket-in Lunglei South bialah vêk MLA atan thlan a ni a, March 30, 2020 khan kum 76 mi niin a thi a ni.

Commerce & Industries department hmalaknain World Health Organisation (WHO) leh Ministry of Health & Family Welfare pawmpui angin Mizoramah hmai tuamna chi hnih - woven fabric leh non-woven fabric siam a ni. Hei vang hian Mizoram sorkar chuan Mizorama damdawi zuarte chu phai aṭangin hmai tuamna chah rih lo a, Mizoram chhunga siam chhuah chauh zuar turin a hriattir. Hmai tuamnate chu Commerce & Industries directorate-ah lei tur a awm a ni.