Assembly budget session a zo
March 15, 2016-a ṭan Mizoram Legislative Assembly pasarihna session ṭum riatna chu nimin tlai dar 2:56 khan zawh a ni. Speaker Hiphei chuan session-a member-te chêt dan chu khawvelin entawn se a duh thu a sawi.
Hiphei chuan, session neih chhungin House-a member-te awm dan a fak a, "House member-te chêt hmang, thusawite leh an awm dante hi khawvelin entawn se ka duh hle. Kristian ram kan nihna a lang. Keima mimal phei chuan member-te inchei danah lawmawm ka ti hle," a ti.
Assembly session-ah hian ni 12 chhung member-te an ṭhukhawm a, session ṭan ni March 15-ah Governor Lt.Gen. Nirbhay Sharma-a'n House-ah thu a sawi. March 16-ah Jammu & Kashmir chief minister Mufti Mohammed Sayeed leh Lok Sabha MP hlui Purno Aigitok Sangma, Meghalaya-te sûnna hun hman a ni.
Tun ṭum session-ah hian Finance minister Lalsawta'n kum 2016-2017 chhunga Mizoram budget tur cheng vbc. 8038.39 House-ah a pharh a, pass a ni.
Ṭum danga tih ngai loh angin, kumin hian budget pharh zawhah Finance Minister chuan thuthar thehdarhtute a kâwm a, an hriat duhte a hrilhfiah.
Session atan hian zawhna ziaka chhan chi (unstarred question) 34 a lut a, chung zinga 30 chu pawm niin, chhan loh panga a awm. GAD zawhna pali leh Health department zawhna pakhat chhan a ni lo. Speaker chuan, "Nakin zelah chuan zawhna lutte hi chhan tum tawh ila," a ti a; ṭha taka zawhna chhangtute zawng zawng hnenah lawmthu a sawi.
Assembly Session dinhmun
θ House-a chhan chi zawhna (starred question) 339 a lut a, chung zinga 304 chu pawm a ni a, 183 chu list of business-ah dah a ni. House-ah zawhna 79 chhan hman a ni a, 103 chu chhan hman a ni lo.
θ Zawhna ziaka chhan chi (unstarred question) 34 a lut a, chung zinga 30 chu pawm niin, chhan loh panga a awm.
θ House-ah paper 19 present a ni.
θ House-ah paper 14 pharh a ni.
θ Bill pali pass a ni a, bill pakhat chu Selection Committee hnenah thawn a ni.
θ Private member resolution 56 a lut a, chung zingah chuan pakhat, 'Medical college din tura hmalak mek hi lawmawm kan ti' tih chiah pass a ni.