Thliin Khawbelah biak-in a lên chhia

Nimin zing dar 2 vel khan thli, ruah leh rial thawkin Khawbel Presbyterian Kohhran biak-in a tichim a, chenna in eng emaw zat a tichhe bawk.

Khawbel aṭanga thu dawn danin, Khawbel Presbyterian Kohhran biak-in hi a ban leh beam RCC a ni a, a bang tile niin, a chung rangva a ni.

Thli hian biak-in ban leh liang kilh zawmna thîr phek (flat iron) zawng zawng (28) chu a nuai bung vek a, biak-in chung chu a rel chawpa lèn phawkin, a lên sawn a, a rel leh a bang ṭhenkhat a tlu bawk a ni.

Biak-in nikuma an luah chauh a ni a, a dung ft. 60 leh a vâng ft. 30 a ni. Khawbel Kohhranah hian member 320 an awm mek.

Biak-in chhia hi nimin khan khawtlangin an senghawi a; hetih lai hian, thliin chenna in a tihchhiatte chu a chhe nasa lutuk lo hlawm nia thu dawn a ni.