Minister leh MLA-te'n ramri an tlawh mek

Minister-te leh MNF MLA-te'n Mizoram ramri hrang hranga state páwn aṭanga lo lut tur vengtute an tlawh chhuah mek chu an chhunzawm zel a; nimin khan MLA eng emaw zatin ramrite an tlawh leh.

Minister of state K Lalrin­liana leh Lunglei HPC vice chairman Lawmawma Tochhawng, MLA-te chuan nimin khan Lung­lei district-a Bangladesh ramri, Tlabung leh a chhehvelte an tlawh a, ramria venhimna kalpui dan leh Khawthlangtuipui Group YMA duty post-te enfiahin, duty-te nen an inkâwm a, hmanrua leh bungrua eng emaw zat a pe.

Minister leh MLA hi Tlabung­ah West Tuipui bialtu MLA Nihar Kanti Chakma hoin Tlabunga sorkar official-te leh khawtlang hruaitute'n an lo dawngsawng a; K Lalrinliana chuan, Covid-19 hripui léng chuan a awh rei chen tur hriat a nih loh thu sawiin, "Kan hnaivai maia awm state leh ram dangahte a pung zel a, kan fimkhur lehzual a ṭul tak zet a ni," a ti.

FCSCA minister K Lalrinliana hian nimin vêk khan a kalna khaw hrang hranga Supply kudamte a tlawh bawk. Sorkar thuchhuah tarlan danin, Lungsen kudamah buhfai quintal 2,440 leh Tuichawng kudamah quintal 1,790 a awm mek a ni.

Minister of state Lalruatkima chuan nimin khan Lawngtlai district chhim tàwpa Myanmar ramri bula awm Zochachhuah leh Hmawngbuchhuah khuate a tlawh a, task force hruaitute nen inkâwmin, hmanraw chi hrang hrang a pe. Minister chuan, phût lêt nei loa ram leh hnam tana ramri vengtute thawhrimna a taka hmuhpui tura thawk chhuak an nih thu a sawi a; thâ thlah loa ṭang tlat turin task force-te a fuih.

Lalruatkima chuan, mipui khawsak tihawlsam nan RD department hmalaknain MGNREGS hnuaiah ni za inhlawhna kalpui zel a nih thu sawiin, "Nikumah ni 100 inhlawhna siam theih a ni a, kuminah pawh advance-in ni 26 tihchhuah a ni a, tunah ni 14 thawh mek a ni," a ti.

Minister of state Dr K. Bei­chhua chuan nimin khan Mamit district-a khaw hrang hrang - West Phaileng, Suarhliap, Saikhawthlir leh Chuhvêl khuaa task force duty-te a tlawh a, Mamita AH&Vety pisa a tlawh bawk. Minister hi Mamit bialtu MLA H Lalzirliana leh C Lalmuanpuia, MLA ten a ṭawiawm a; task force-te hnenah hmanraw chi hrang hrang an pe a ni.

Dr K Beichhua chuan, Co­vid-19 dona hmalaknaah mipui an lungrual zawk theih nan minister leh MLA-te hnuaiah ni loin, Chief Secretary kaihhruaina hnuaiah hmalak a nih thu a sawi a, "Mahni party nihna dah bo a, kan ram a him theih nan mi tinte'n 'Sem sem dam dam, ei bil thi thi' kalphunga kal a ngai. Ei leh bara kan intodelh theih nan theihtawp i chhuah zel ang u," a ti.