Hydel project thawh lai panga a awm Serlui-B Hydel Project chei ṭhat tum

Power & Electricty changtu, chief minister Lal Thanhawla chuan, MPC member Lalthanliana zawhna chhangin, tun dinhmunah Mizoramah hydel project thawh lai mek panga a awm thu House a hrilh.

Hetih lai hian, Serlui-B Hydro Electric Power (HEP) project chu megawatt 12 pe chhuak thei tura siam ṭhat tum mek a ni.

CM Lal Thanhawla tarlan danin, Mizorama hydel power project siam hna thawh mekte chu - Tlawva HEP, Kawlbem HEP, Tuiching MHP, Tuiriza MHP leh Tuirial HEP-te a ni.

Chief Minister chuan, Serlui-B HEP aṭangin tun dinhmunah kawlphetha megawatt 8 siam chhuah mek a nih thu sawiin, "Serlui-B ah hian unit pathum, megawatt li ṭheuh pe chhuak thei tur bun a ni a, tunah hian unit khat a chhia a, siamṭha turin buaipui mek a ni a, khawl ṭhenkhat pawh chah thlen a ni tawh," a ti.

Lal Thanhawla tarlan danin, Serlui-B HEP hi tlai dar 4 aṭanga zan dar 10 leh zing dar 6-10 chhung tihnun a ni a, kawlphetha indaih loh zual chángin a ṭul anga hman a ni. January 2016 thleng khan kawlphetha million unit 114.89 pek chhuah a ni tawh a, hei hi cheng vbc. 50.59 man a ni.

MNF member Dr K Beichhua zawhna chhangin Lal Thanhawla chuan, Kolodyne-II HEP khuap turin techno economic clearance neih a nih tawh thu a sawi a, "Forest clearance buaipui leh mek a ni," a ti.

Chief Minister tarlan danin, Kolodyne-II HEP atan forest clearance chungchangah Ministry of Environment & Forest chuan NTPC Ltd. chu forest clearance an dilna ngun lehzuala zir chiang turin a ti a, MIRSAC chu GPS chungchanga thil pawimawhte ti tura ngen ni se tih a ni. Mahse, NTPC Ltd.-in tun hnaia forest clearance-ah hmalakna thar an nei lo.

NTPC Ltd. chuan kum 26 chhung tui tam dan an zir chiannaah environmental flow vangin kawlphetha siam chhuah tura beisei a tlahniam tih an hmuchhuak a; hei vang hian kawlphetha siam chhuah man pawh unit khatah Rs. 11-ah a kai chhoh phah a ni.

Sorkar thutlukna hnuhnung berah chuan, NTCP Ltd.-in kawlphetha leitu tur an zawng ang a, Power Purchase Agreement siampui tur a hmuh loh chuan he project hi Mizoram sorkar hnenah a hlan lêt leh ang tih a ni.