MNF-in John Rotluangliana Báng turin an phût

MNF vice president R Tlanghming-thanga chuan, Food, Civil Supplies & Consumer Affairs (FCSCA) minister John Rotluangliana chu Mizorama Supply ration card thar dik lo nasa lutukah a mawhphurtu ber a nih thu sawiin, MPF party-in báng turin an phût tih a sawi.

R Tlanghmingthanga hian nimin khan Aizawl Press Club-ah thuthar thehdarhtute a kâwm a; Congress party kaihhruai sorkar chu National Food Security Act (NFSA) hmang duh lawk loah puhin, "CM Pu Lal Thanhawla'n hmang tura hmalak a hnêkin July 19, 2013 khan Mizoramah hman a nih loh tur thu a sawi zawk a. Supply minister Pu John Rotluangliana pawhin 'Dan sakei' tiin a sawi hial a ni," a ti.

MNF Vice President chuan, ration card thara dik lo tam tak awm chu sorkarin a thlawna a siamṭhat vek an phût thu sawiin, Tlanghmingthanga chuan, "Ration card dik lo siamṭhat lehna hi sorkarin mipuiah ṭhíng nawn tawh suh se," a ti a; ration card siam thar nan hian Supply department-in cheng nuai 67.5 a nei reng nia sawiin, "Ration card khul nana Rs. 20 min chawitir hi a chhan sawifiah turin Supply Minister kan phût," a ti.

Ration card-a dik lo tam tak awmah Supply Minister chu mawh la ngam loa mawhpuh tur zawng kualah puhin, Tlanghmingthanga chuan, "Ngaihdam dil a hnêkin Assembly House-ah LC leh VC-te'n form an fill up dik loh vangah a puh ngam hi mak kan ti," a ti a, chhungkaw tinte form fill-up sa hah taka buaipuisaktu LC/VC-te dik lo taka a puhna hi ngaihdam dil nachang hria se a finthlak tur thu a sawi.

R Tlanghmingthanga chuan, CM Lal Thanhawla'n Assembly House-ah ngei ration card tih dik loha a mawhphurtu chungah dan lekkawh a nih tur thu a sawi nia sawiin, "Supply Minister aia mawhphur zawktu hi tu nge awm chuang?" a ti.

MNF Vice President dawn danin, March thla quota buhfai sem a ni a, mahse, mipuite chu an quota tur ang zat an pe kim thei lo. FCSCA hotute an zawhfiahnaah, March thla quota chu phase hniha pek tur angin an chháng a; March thla a ral avangin March thla quota thawh hnihna an pek kim hun tur a zawt a ni.