KHAWTHLIR

Headmaster nei lo

School Education minister H Rohluna chuan MNF member Lalruatkima zawhna chhangin, tun dinhmunah headmater nei lo high school 39 leh middle school 98 an awm mek thu House a hrilh.

Director pension

Hospital & Medical Education director Dr Lalbiakkima chu nimin khan superanuation pension-in sorkar aṭangin a châwl. Amah thlaktu tur hi sorkarin a la ruat rih lo.

MWA Top-3

Mizo Writers’ Association (MWA)-in kum 2015 chhunga Mizo ṭawnga lehkhabu lehlin ṭha ber a thlanna kal mekah a ṭha zual pathum a thlang chhuak tawh a; chungte chu - M Lalmanzuala lehlin 'I dam chhan eng nge ni' tih te, Lalzarzova Khiangte lehlin 'David Livingstone' tih leh, R Lalchhuana lehlin 'O Jerusalem' tihte a ni.

Jail tang

MNF member Dr. K Beichhua zawhna ziaka chhangin Prison minister R Lalzirliana chuan February 28, 2016 thleng khan Mizoramah jail tang mi 1198 an awm thu tarlangin, "Heng zinga 562 chu thiam loh chantir an ni," a ti.

Pipe lei zat

Agriculture minister R Lalzirliana chuan MPC member Lalthanliana zawhna chhangin, kum 2014-15 chhungin HDPE pipe milimetre 7 roll 5,494 leh milimetre 2 roll 1,443 lei a nih thu House a hrilh.

Tlawh chhuah tum

Kolasib district-a DEO office-a Education dept. hotute ṭhukhawm chuan sikul ṭan hun April 5 aṭangin Kolasib leh a chhehvelah sikul zawng zawng tlawh chhuah nise, an ti. Education dept. hotute hian nimin vek khan Kolasib district-a zirtirtu zawng zawng kokhawmin, infuihtharna hun an buatsaih.

Kawng laih zat

MPC member Lalthanliana zawhna ziaka chhangin, PWD changtu chief minister Lal Thanhawla chuan, kum 2014-2015 chhungin PWD-in kawng thar (widening telin) kms. 58.915 laih a nih thu a tarlang.