Vawk chi ṭha dahna tur tlawh

AH&Vety minister Dr K Beichhua chuan May 28, Ningani khan Lengpuia vawk chi ṭha, chi thlah tur dahna Neucleus Boar Semen Station siamna hmun tur a tlawh a; sa leh ran chawa intodelh tura hma an lak thu a sawi.

Lengpui VC House-a Lengpui, Hmunpui leh Serzawl village council member-te nen an inkawmnaah thu sawiin K Beichhua chuan, "Inkhàrkhip vangin harsatna tam tak kan tâwk. Covid-19 vanga kan buaina tur sutkian nan sa leh ran chawa kan intodelh a, kan inkhai chhuah theih nan sorkarin nasa takin hma a la mêk a ni," a ti.

Dr K Beichhua chuan, Lengpui leh a chhehvel ramah agriculture leh a kaihhnawihah nasa taka hmalak a nih tur thu sawiin, "Saa kan intodelh theihna tur sorkarin a dap mek a ni," a ti a; Lengpui, Lengte, Nghalchàwm, Hmunpui leh Serzawl khaw ramte chu ran vulhna atan hmun ṭha a nih thu a sawi.