Lungleiah Covid-19 endikna lab.

Indian Council of Medical Research (ICMR) inkaihhruaina anga National Health Mission (NHM), Mizoram hmalaknain nimin khan Lunglei Civil Hospital-ah Covid-19 testing laboratory din a ni a; hmanrua - biosafety level-2 laboratory, Molbio Truenat khawl pahnih bun a ni.

Sorkar thuchhuah tarlan danin, Covid-19 testing laboratory khawlte hi NHM hnuaia National TB Elimination Programme hnuaia bun a ni a; Lunglei Civil Hospital-a microbiologist Dr RSC Vanlalruati, IDSP microbiologist ZD Lalremruati leh laboratory technician-te hnenah state nodal officer Dr Krossnunpuii, Truenat Covid-19 Testing leh senior laboratory technician K Lalrinsanga ten training an neihpui.

Truenat Covid-19 test hi ICMR-in PCR tluka rintlaka a ngaih a ni a; quality run pass leh ICMR-a registration tihfel a nih hunah Covid-19 vei leh vei loh endik nan hman theih a ni ang.