Ni 100 inhlawhnaa hlawh tur sum Central-in vbc. 164.27 a rawn pe

Sorkar laipuia Ministry of Rural Development chuan January 9, 2024 khan Mahatma Gandhi National Rural Em­ploy­ment Guarantee Scheme (MGNREGS) hnuaia Mizorama job card neite inhlawhnaa an hlawh tur (wage component) cheng vbc. 164.27 a rawn pe chhuak.

Ni za inhlawhna, MGNREGS hnuaia job card neite hlawh pek chungchang hi Mizoram sorkara Rural Development department chuan a sawifiah a; MGNREG Act leh Operational Guidelines angin MGNREGS hnuaia mipui inhlawhna (wage) chu Mizoramah thla tin tluang taka kalpui ṭhin a nih thu a tarlang.

RD department chuan, tun hnaiah thingtlang mipui inhlawhna sum sorkar laipuiin a pek chhuah loh avangin job card neite bank account-ah hlawh lut lo a awm nual tih hriat a nih thu a tarlang a, "Inhlawhna wage payment hi central duh dan leh ruahmanna angin online leh electronic payment vekin NeFMS hmanga kalpui a ni a, mipui inhlawhna mil zelin NREGASoft hmanga fund transfer order (FTO)-te MIS-ah siam zel ṭhin a ni. FTO hmang hian central sorkar chuan job card neitute account-ah direct-in inhlawhna pawisa a rawn thun ṭhin," an ti.

RD department tarlan danin, MGNREGA hnuaia inhlawhna sum chu sorkar laipuiin a vaia a tum (100% direct funding) a ni a, Mizoram sorkara Finance department a kaltlang lo a, job card neitute bank account-ah direct benefit transfer (DBT) hmangin sorkar laipui aṭangin thun (credit) ṭhin a ni. Mipui inhlawhna ang zelin Mizoram RD department chuan FTO chu MIS-ah district leh block kaltlangin a siamsak ṭhin.

MGNREGS-ah Mizoram sorkarin tihkhawtlai (pending) a nei lo tih tarlangin RD department chuan, "FTO siam (generate) leh utilization certificate thehluhte pawh a ti vek tawh. Central sorkarah a rang lama mipui inhlawhna pe thuai turin a dil a, central sorkar pawhin a tahtawlin mipui inhlawhna leiba (liability)-te a rawn clear ve leh mai ṭhin," an ti.

RD department chuan, Ministry of RD-in January 9, 2024 khan wage component atan cheng vbc. 164.27 a rawn pe chhuak tih tarlangin, "Tuna wage payment la clear lohte pawh clear vek tura hmalak mek zel a ni a, DBT hmangin mipuite account-ah a lut vek dawn," an ti a; chî-âi lo tur leh dawhthei taka nghak turin mipui an ngen a ni.