Lengpui Airport mi dang hnena hlan tum bawhzui turin working group din

Chief minister Lalduhoma hoin sorkar mi pawimawhte'n nimin khan CMO Conference Hall-ah mi dang hnena Lengpui Airport hlan chungchang an sawiho a; a ṭul apiang bawhzui turin working group din an rêl.

Ṭhutkhawmah hian India ram hmun danga airport eng emaw zat, Airport Authority of India (AAI) kuta awm mekte enkawl zui dante leh private company-te'n PPP (public private partnership) mode-a an kuta awm an enkawl dante tarlan a ni.

India rama airport dangte enkawltu leh an dinhmunte ngaihtuah chungin Lengpui Airport chu AAI hnenah nge private company hnena hlan ṭha zawk dawn tih te, Mizoram tana hlâwk ber turte kil hrang hranga zir chiang a, khaikhinna chipchiar nei turin Working Committee (working group) din ni se, an ti.

Working group chu a rang lama lo bawhzui turin an ti a, report kimchang an neih hunah ṭhutkhawm leh turin an dah a ni. Lengpui Airport ram venhim dan tur te, Airport-a thawktu pawimawh dah belh nghal ngai nia langte ṭhutkhawmah hian sawi lan a ni bawk.

Ṭhutkhawmah hian adviser to chief minister TBC Lalvenchhunga, chief secretary Dr Renu Sharma, Resource Mobilisation Committee vice chairman Haukhuma Hauzel leh sorkar official dangte an tel a ni.