CM leh AMC hotute an inkâwm

Chief minister Lalduhoma chuan nimin khan a pisaah Aizawl mayor Lalrinenga Sailo leh a thawhpui corporator-te a kâwm a, AMC mamawh hrang hrang an sawiho.

CM Lalduhoma chuan, tun hnaia Aizawl bawlhhlawh paihtute'n bawlhhlawh paihna man an hmuh loh rei vanga an chawlh a ngaih mai theih thu a lo hria tih sawiin, Finance department hotute a bia a, bawlhhlawh paihna sum pek chhuah tur awm angte pe chhuak tura a hrilh nghal thu a sawi.

Lalduhoma chuan, Aizawl chhuah lam leh tlâk lamah by-pass road a awm thuai dawn tih sawiin "Chu chuan nasa takin Aizawl khawpui hi a zauh dawn. Chhuah lama by-pass road thawhna tur chu Road Transport & Highways Minister-in a sanction tawh a ni," a ti.

Chief Minister chuan, Aizawlin bawlhhlawh paihna a mamawh belh thu sawiin, Hualngohmuna Solid Waste Management Centre siam mek leh Luangmual Industrial Growth Centre-a siam mekte chu uluk takin an vil dawn a, a hunah, a nihna tur ang taka siam zawh ngei an phût dawn tih a sawi. Sihphira bawlhhlawh sawngbawlna siam tur pawh an ûm zui dawn thu a sawi bawk.

Mayor leh a thawhpuite hian Aizawl khawpui zauh zelna tura hmalak a ṭulna te, sorkara an dinhmun (status) hniam lutuk te, an lawmman beitham lutukte leh state danga anmahni ang corporator an phak loh dante CM an hrilh a; sorkar laipuia urban local body fund tam tak hâi chhuah tur awm chu tun aia nasa zawka hai chhuah dan a awm theih thute an sawi.

CM chuan, AMC corporator-te dinhmun siamṭhat a ṭulna lai te, India ram hmun danga corporator-te nena an dinhmun khaikhinnate leh lehkha pawimawh dangte ziakin a hnena thlen turin a lo chah a ni.