Free Movement Regime ṭhiah loh nan CYMA-in hmalak an tum

Central YMA chuan thuchhuah siamin, India sorkarin India leh Myanmar ramri hnaiha Free Movement Regime (FMR) tihbo a tum chu an duh lo a, ṭhiah a nih loh nan theihtawpa hmalak an tum thu an tarlang.

India leh Myanmar ramri hnaiha khuahkhirhna awm loa km. 16 chin thleng inkalpawh tawn theihna FMR sorkar laipuiin tihbo a tum nia sawi chungchang hi CYMA chuan January 8, 2024-a an ṭhutkhawmah an ngaihtuah a; thuchhuah an siam zui a ni.

CYMA tarlan danin, FMR chu September 26, 1968-a siam a ni a, India leh Myanmar ramri hrûla visa ngai loa km. 16-a thui ve ve inkalpawh tawn theihna a ni. FMR siam a nih chhan chu - ramri lehlam ve veah hnam khat, chi khat leh chhungkhat lainate an awm ṭhin avangin awlsam taka an inkalpawh theih nan te, insumdawn tawnna leh ei leh bâr zawn a awmsak zawkna atante a ni.

FMR chu Mizoram leh Myanmar lama Mizote tan inpumkhatna atan leh thil dang atan pawh a ṭangkai hle tih sawiin CYMA chuan, "Mizo hnam tana ṭangkai a nih laia India sorkarin ṭhiah a tum hi ṭha kan ti lo a, FMR ṭhiaha ramri hungna siam a nih chuan Mizo hnam inpumkhatna nasa takin a tichhe dawn. Chuvangin, ṭhiah a nih lohna turin theihtawpa hmalak ni se," an ti.

Free Movement Regime ṭhiah a nih lohna tura Mizoram sorkar hmalakna an thlàwp tlat thu CYMA chuan an tarlang bawk.