SEDP non-teaching staff-te hlawh la ba

Mizoram sorkar chuan MNF sorkar laia flagship programme - SEDP hnuaia sikula thawk tura lak non-teaching staff (zirtirtu ni lo)-te chu a bàn tawh a, mahse, an hlawh a la ba mek.

Vanglaini thu dawn danin, SEDP non-teaching staff-te hi December 2023 laihâwl thleng an kal a, sorkar thar a pian hnuah bàn an ni. Sorkarin hlawh a batsak mek a, chu'ngte chu October, November leh December thla hlawhte a ni.

SEDP non-teaching staff-te hi hi sikul hrang hranga thawk an ni a; an aiawh turte lâk a nih dawn leh dawn lohah sorkarin thutlukna a la siam lo.

Hetih lai hian, SEDP hnuaia zirtirtute chu Mizoram sorkarin kumin financial year chhung zawng a chhawr chhunzawm dawn. Chief minister Lalduhoma sawi danin, financial year 2023-24 zawha an awm zel dan tur chu School Education Minister-in a ngaihtuah dawn a ni.