KHAWTHLIR

Missionary Day

Vawiin January 11 hi Mizorama missionary hmasa ber pahnih Rev. FW Savidge (Sap Upa) leh Rev. JH Lorraine (Pu Buanga) ten kum 1894-a Mizoram an thlen champha, Missionary Day a ni. Baptist Church of Mizoram chuan Missionary Day hi awmni khamin an làwm dawn a, tualchhung kohhran eng emaw zat chuan ruai an ṭheh dawn. Mizoram Synod tarlan danin, January 11, 1894 hi Mizoram Presbyterian Kohhran chuan an kohhran din ní atan an pawm thung a, kum 2018 aṭang khan Mizoram Presbyterian Kohhran din ṭan ní angin an hmang a ni.

Thisen pe

KṬP, Khuangpuilam Branch chuan nimin khan an kohhran hall-ah thisen pek runpui an huaihawt a, Kolasib District Hospital tan thisen unit 31 an pe a, petute mipa 22 leh hmeichhia pakua an ni.

AR-in heroin man

Assam Rifles chuan January 8, 2024 khan Zokhawtharah heroin gram 139 an man a, international market-ah cheng nuai 97.30 hû a ni. January 8 vek khan Champhai Jail Vengah ram dang meizial bawmpui 20 an man a, cheng nuai 26 hû a ni. Zokhawthar Police hnenah heroin an hlân chhawng a, foreign cigarette chu Champhaia Customs hnenah an hlan thung.

Sikul fang kual

Aizawl South-III bialtu MLA Baryl Vanneihsangi chuan January 9, Thawhlehni aṭang khan a bial chhunga sikulte a tlawh a; sikul hmunhma, harsatna leh mamawhte a enfiah bakah, zirtirtu leh zirlaite'n an mamawh an thlente a ngaithla. MLA hian January 12, 2023 hian a biala sikulte tlawh chhuah hman a tum a ni.

Friendly match

Assam Rifles 20th Battalion chuan nimin khan Thosai khelmualah friendly football match an buatsaih a, company commander Maj. Rajkishor-a'n a hmanpui. Friendly match-ah hian Assam Rifles D company leh Thosai khaw team an inkhel a, mi 200 velin an ṭawiawm. Maj. Rajkishor chuan, AR leh tualchhung mipui inlaichìnna ṭha zawk a awm theih nan friendly match an buatsaih thu a sawi a, "Mipui himna pek leh an tana thawh hi kan hna pawimawh ber a ni," a ti.