Sorkar khalh ngíl turin chàwl hauh loin ram tan ke kan pên dawn - Lalchhandama

MNF Legislature Pary leader Lalchhandama Ralte chuan, sorkar khalh ngíl turin chàwl hauh loin ram tan ke an pên dawn thu a sawi.

Lalchhandama Ralte hian January 9-10, 2024 chhungin a bial Tuivawl constituency-a khaw hrang hrang a fang a; amah thlang tlingtu mipui hnenah lawmthu sawiin, "Ram tan theihtawp chhuahin hna kan thawk ang a, sorkar khalh ngíltu ni turin constructive opposition hna kan thawk ang a, chàwl hauh loin ram tan ke kan pên dawn a ni," a ti.

Tuivawl bial vawng tura thlan chhuah a nih lehnaah Lalchhandama chuan amah duhsaktute chungah lawmthu a sawi a; amah vote-tu leh vote lotute chu an bialtu MLA a nih angin a lakah inthlahrung lo turin a chah.

Oppisition Leader chuan, sorkar hmasain Tuivawl biala hma a lakna hrang hrang kal mekte chak taka chhunzawm zel a nih theih nan hma a lak chhunzawm dawn thu a sawi a; bial chhung harsatnate a hnena thlen zel tura chahin, a tih theih chinah tlânchhe loin bial tan leh ram tan a ṭul apiang thawh zel a tum thu a sawi bawk.

Lalchhandama Ralte hian January 9 khan Mauchàr, Palsáng leh Zohmun khuate tlawhin, khawtlang hruaitute nen an inkawm a, SASCI aṭanga sum hmuh hmanga sak Palsangah community hall a hawng. Nimin khan Zokhawthiang, North Ṭinghmun, Upper Sakawrdai, North Khawdungsei leh Sakawrdai te a tlawh a ni.