Provisional adhoc school-te'n harsatna CM an hrilh

Mizoram Provisional Adhoc School Association (MPASA) hruaitute chuan nimin khan chief minister Lalduhoma a pisaah an hmu a, an harsatna tawhte an thlen. CM chuan, sikulte sorkarin a theih ang angin tihhmasawn a tum thu a sawi.

CM Lalduhoma chuan, Mizoram sorkarin a theih ang angin sikulte tihhmasawn a tum thu MPASA hruaitute a lo hrilh rualin, sorkar hmasain tun hnaia sikul ṭhenkhatte dinhmun a tihdanglamte chu an la ngaihtuah hman rih loh thu leh sorkar sum dinhmun a ṭhat loh thu a sawi a ni.

ZPM sorkar huna hman turin kum hnih leh a chanve chhung chu Education Policy tur an lo duang tawh tih sawiin Lalduhoma chuan, "He kan policy leh tuna in awm dan te, sikul dang dinhmunte pawh huamin uluk taka kan en a ṭulin a rinawm. Cabinet hmaa pharhte pawh a ṭul ang a, chuvang chuan tunah rih chuan eng mah han sawi theih ka nei rih lo a ni," a ti.

Lalduhoma chuan, MPASA thil thlente chu School Education Minister a lo sawipui tur thu sawiin, "Inpawh takin engkim kan sawiho zui zel dawn nia," a ti a; a bial - Serchhip bialah pawh provisional adhoc school-a dah thar a awm ve thu sawiin, an dinhmun leh harsatna tam tak a hriatpui thu a hrilh.

MPASA hruaitute chuan, kum 2023 tàwp lama sorkarin sikul ṭhenkhat dinhmun a tihdanglam zingah tun hmaa lumpsum school ṭhinte chu provisional adhoc dinhmunah dah a ni a, provisional adhoc-ah hian higher secondary school 34, high school 11 leh middle school pasarih a awm mek tih an sawi.