IPR dept leh MJA-te inkâwm

Kolasib-a Information and Public Relations department leh Mizoram Journalists' Association-te chuan nimin khan Kolasib-a IPRO C Lalhruaitluanga pisaah kum thar 2024 pualin inhlan tharna leh inkawmhona hun an hmang a; kum 2023 an thlir lêt bakah, kuminah ṭha zawka an thawhho dan tur an sawiho a ni.

IPRO C Lalhruai­tluanga chuan, kum 2023 chhunga Kolasib MJA-te nen an thawhhonaah tih fuh tâwk loh awm theiah thupha a chawi a, kum 2024-ah ṭha tak leh lungrual taka an thawhho a beisei thu a sawi. MJA-te chu inthlahrung loa a ṭulna apiangah IPR department-a thawkte fuiha finchhuah turin a sáwm a; Kolasib-a chanchinbute'n hma a sawn zel theih nan ṭang mar turin a chah.

MJA, Kolasib district president Andrew Vanlalauva chuan, IPRO-in fuihna thu a sawite chu MJA member-te'n hmasawn nan an hman ngei a beisei thu a sawi a; Kolasib MJA-te'n IPR department mai bakah, sorkar department dangte pawh ṭha takin an thawhpui zel dawn tih a sawi bawk.