Chief Minister leh bank hotute inkâwm

Chief minister Lalduhoma chu nimin khan a pisaah Mizoram Rural Bank chairman Sheryl L Vanchhawng leh State Bank of India regional manager Rakesh Ravi ten lawmpuina an hlan. MRB Chairman chuan, MRB manager atan Mizo ṭhalai tling thei an tlem avangin an mangan thu a sawi.

Lalduhoma chuan, MRB credit-deposit (CD) ratio chu Mizorama a ṭha ber zinga mi a nih thu a sawi a, "Mipui mamawhna vanga inzauh zel tura kan nawr ngam bank in ni a, mipui leh sorkar aṭang pawhin duhsak in phû hlein ka hria. Sorkarin a taka hand holding policy a kalpui hunah bank-te nen inhnaih taka thawh a ṭul dawn," a ti.

MRB hotute chuan, MRB kaltlanga sorkarin sum tam zawk a khawih ve theihna tur an dil a; MRB manager atan Mizo ṭhalai tling thei an tlem avanga an mangan thu an sawi a, an harsatna sutkian dan tur nia an hriatte an sawiho bawk.

SBI regional manager Rakesh Ravi, SLBC convenor ni bawk chuan an hmalakna hrang hrangte CM a hrilh. CM Lalduhoma chuan, hand holding policy kalpui dan tur tlangpui Rakesh Ravi a hrilh a, CD ratio ṭha zawk neia mipui tan a zau thei ang bera inhawng turin a chah.

Bank kaltlanga sorkar scheme kalpui ṭhinah a kaihhruai sorkar chuan engkim uluk tak leh dik taka an kalpui dawn thu sawiin Lalduhoma chuan, beneficiary thlan thuah pawh a tling leh tlâkte chauh an thlang ṭhin dawn tih a sawi a ni.