Electoral roll ennawn mek sawiho

Chief electoral officer Madhup Vyas chuan nimin khan Mizoram State e-Governance Society (MSeGS) Meeting Room-ah Mizorama political party hrang hrang aiawhte Mizoram electoral roll ennawn mek chungchang a sawipui.

Madhup Vyas chuan, electoral roll dik leh felfai neih a nih theih nan thawhpuiah political party-te a sáwm a; khawpuiah hmun pakhat aia tamah electoral roll-a hming chuang emaw, hmun danga insawn tawh, an awmna hmasa electoral roll-a hming la awm emaw, mitthi tawh, roll-a la chuang site a awm loh nana ṭan lâkpui turin a ngen.

Mizoram CEO chuan, Election Commission of India (ECI) duh dan angin electoral roll felfai tak neih a nih theih nan booth level officer (BLO)-te enpui turin political party-te a ngen a, booth level agent (BLA) ruat turin a ngen bawk.

Special Summary Revision of Photo Electoral Roll, 2024 atana bechhana hman tur draft electoral roll, January 6, 2024-a tlangzarh taka a lan danin, Mizoramah voter 8,52,087 an awm a, mipa 4,13,063 leh hmeichhia 4,39,024 an ni. Kum 80 chung lam mi 11,194 leh rualbanlo voter 3,381 an awm.

Electoral roll ennawn mekah hian January 22, 2024 thleng dilna hun hawn a ni a, electoral roll thar chu February 8, 2024-ah tlangzarh tum a ni.