Teirei lei dawh lai chim chhan sawifiah

May 27, Ningani zíng khawvar hmaa Darlak khaw bula Teirei luia lei (RCC bridge) dawh mek chim chungchang chu nimin khan PWD-in an sawifiah. Lei a chim lai hian contractor-te'n vên tuma theihtawp chhuah­in tui luanna turte a chim zanah an siam tih sawiin, "Amaherawhchu, an chhan zo ta lo a, lei dawh lai chim hi PWD chuan pawi a ti tak zet a ni," an ti.

NH-44A kawngpui chu Ministry of Road Transport and Highway (MoRTH) hnuaia siam niin, Mizoram PWD-in an enkawl tih sawiin PWD chuan, "Kawng hi Lengpui leh Tripura ramri Langkaih lui thlenga hna thawh lai mek a ni a, Gayatri Project Ltd., Hyderabad-te hnenah March 3, 2011 khan pek a ni," an ti a; March 2011 thla tàwp lamah hna ṭan a nih thu an tarlang.

PWD tarlan danin, Teirei lei dawh mek chu a láiah ban (pier) pahnih awmin, ban kar pathum nei, a sir ve ve metre 10-a sei a ni a, a lai ban kár erawh chu mere 40 a ni. Lei chim lai chu ban kár laia beam-te a ni.

April 2018 khan pile foundation leh abutment-te siam ṭan a ni a, mahse, ruahtui tlak hnuah chhunzawm hleih theih a ni lo. December 2018-ah chhunzawm a ni a, foundation pile leh abutment chu February 2020-ah siam zawh a ni. Tuna chim ta, a lai span chu pre-stessed concrete girder (beam) niin, pali a awm a, beam hlai záwng chu metre 2.60 niin, a chhah záwng chu metre 1.20 a ni thung.

Beam ṭhenkhat chu Covid-19 vanga inkhàrkhip hmain chhùn zawh hman a ni a, inkharkhip vanga cement a awm tâk loh avangin zawh theih a ni lo a, May 25-ah beam concrete chu chhûn zawh niin, a la chár ṭha hman lo.

PWD chuan, beam-te chu pre-stress tih hnuah a chakna awm chauh tur a ni tih tarlangin, "Pre-stressing ti tur hian hmanrua leh mihring thiam bik ngai a ni a, lockdown avangin mithiam bik an lo lut thei lo a, chuvang chuan, tui lianin a beam dotu ber a tihchhiat tâkah chuan pre-stress hman loh beam hian chakna a la neih loh avangin a chim ta a ni," an ti.

Lei dawh mek chim ta chu contractor-te hna thawh lai mek a nih avang­in contractor-te'n anmahni sum séngin an siamṭhat leh tur a nih thu sawiin PWD chuan, "An hna hi hetiang lakah hian insure a nih bawk avangin contractor-in a chàn leh hlohte a dil (claim) leh thei bawk," an ti a; lei dawh hna chu ṭhál a nih veleh chhunzawm leh tur a nih thu an tarlang bawk.