Central YMA-in ruihhlo donaah Ṭan la thar turin YMA-te a ngen

Central YMA chuan YMA sub-heaquarters, group leh branch-te hnenah lehkha thawnin, ruihhlo donaah ṭan la thar turin a ngen.

CYMA chuan, Mizoramah ruihhlo leh a kaihhnawih thil ṭha lote'n nasa takin bu a khuar tih tarlangin, "Ruihhlo avang hian kan ṭhalai eng emaw zatin nunna an chán tawh a, chhungkaw tam tak an rûm mek. Ruihhlo leh a kaihhnawih hmanga sumdawnna thianghlim lo kal pui eng emaw zat an awm a, hei vang hian YMA pawhin theihtawp chhuahin ruihhlo do hna kan kalpui mek zel a ni," an ti.

Ruihhlo vanga thi an awm belh zel avang leh ruihhlo hluar zel tur donaah sub-heaquarter, group leh branch-te an huam chhung ṭheuhah theihtawpa ṭan la thar turin CYMA chuan a ngen a; hmalaknaah fimkhur tur leh a remchan anga Police, Excise & Narcotics department leh khawtlanga hma latu pawlte thawhpui turin an ngen bawk.