MIMA-in CM hnenah an duhte an thlen Phai lam nen curfew hrût rual ṭha an ti lo

Mizoram Merchant Association (MIMA) hruaitute chuan May 28, Ningani khan chief minister Zoramthanga an hmu a; Mizoram dawr hawn hun chhung chu a rei lo lutuka an hriat thu leh, zan lama curfew hun chhung chu phai lam nen hrût rual a remchang loa an hriat thu an thlen.

MIMA chuan, Mizoram chu Covid-19 lèn dan tehnaah green zone a ni tih sawiin, zan lama curfew, zan dar 7 aṭanga a tuk zing dar 7 tih chuan harsatna a thlen tih an sawi a, "Mizoramah ni a chhuak hma a, zíng takah dawr an inhawng ṭhin. Tlai lamah erawh an inkhar hma ṭhin laiin, state dangte'n zan lamah rei tak hna thawkin, zing lam erawh hna an ṭan har hle," an ti. Ni chhuah hun a inan loh avangin state dangte nen khairual chi a ni lo a, curfew hun chhung tidanglam turin an ngen a ni.

Mizorama dawrte chu inhawn chhâwk a nih avangin thla khatah ni 12 chiah an inhawn theih laiin, tlai dar 5 thleng chauh hawn theih a ni chu a rei lo lutuk an tih thu sawiin MIMA chuan, "Sorkar hnathawk tlai dar 5-a báng ṭhin tan mamawh leina hun a awm lo. Bungrua lo thlengte hi khawpuiah a phurtu motor lian zan dar 8-ah lo lutin, zing dar 7-ah khawpui a chhuahsan leh vek tur a ni bawk si a, bung­rua hlànthlâk chungchangah curfew hun chhung vangin harsatna nasa tak a thleng a ni," an ti.

MIMA tarlan danin, Mizoramah pawh kum 2018-19 chhunga sumdawngte'n GST sorkara an chhùn luh chu cheng nuai 662 a ni a, chu bakah chuan dawr tinin professional tax Rs. 2,500 an pe bawk. Mizoramin sum lak luhna dang a neih ṭhat loh avangin sumdawngte harsatna hrethiam a, Mizoram economy ti ṭha tura hmalak ran a ṭul thu CM hnenah an thlen a ni.

MIMA hruaitute chuan New Market building sak ṭhat turah lockdown vangin in chu ṭhiah hleih theih a ni lo a, hnathawh tak tak theih a nih hma chuan New Market-a dawr neite'n an bungruate an hralh theihna hun pe turin CM an ngen bawk.

Chief Minister an hmuh zawhah MIMA hruaitute chuan Chief Secretary an hmu leh a, CM hnena an thlen ang tho an thlen leh a ni.