Lei chim vangin PRISM ṭhalaiin CM Zorama báng turin an phût

PRISM party ṭhalaite chuan, Dárlâk khaw bula Teirei luia lei dawh mek May 28, Ningani zing dar 3 vela a chim avangin PWD enkawltu chief minister Zoramthanga chu báng turin an phût.

PRISM ṭhalaite hian nimin khan thuchhuah siamin, Teirei lei dawh mek chim chungchanga sorkar insawifiahna chu mipuite'n thu tlingah an pawm lo niin an tarlang a, "PWD minister Pu Zoramthanga báng turin kan phût. MNF minister zingah Pu Zoramthanga department chan a buai bik em em mai hian Pu Zoramthanga hi politics-ah a tluang tawh lo hle niin kan hria a, ram leh hnam tana chawlh la rih mai turin kan ngen a ni," an ti.

Zoramthanga kaihhruai MNF sorkar chu kum hnih pawh a tlin hmaa an lei dawh a chim chu thil zahthlak a nih thu sawiin PRISM ṭhalai chuan, "Lei chim hian MNF sorkar term kal laia sorkar lo awm zel dan tur a hril hlein kan hria. MNF hian CM hi an thlâk vat loh chuan lei mai ni lo, an sorkarna thlengin a chim mai ang tih pawh thil hlauhthawnawm tak niin a lang," an ti a; MNF party-in sorkar an enkawl thiam loh vanga an sum báwm a chim laia an lei dawh a chim leh chu lainatawm an tih thu an sawi.