Aizawl bawlhhlawh paihna man tur state sorkarin AMC-ah a pe tawh : Lirthei dintir tumah thu mûm a awm rih lo
Aizawl khawpuia bawlhhlawh paih man tur Mizoram sorkarin Aizawl Municipal Corporation (AMC)-ah pe tawh a, mahse, bawlhhlawh paihtu lirtheite'n bawlhhlawh paih man an la dawn loh avangin January 15, 2024 aṭanga bawlhhlawh paih loh an tum chu an kaltlangpui dawn leh dawn loh an sawi chiang thei lo.
Thu dawn danin, Aizawl khawpui bawlhhlawh paih man tur pawisa chu sorkar laipui (15th Finance Commission) aṭangin Mizoram sorkarin a dawn hnuah hun eng emaw chen a hrêng a, bawlhhlawh paih chungchang buaipuitu AMC-ah a pe mai lo a, hei vang hian October 2023 aṭangin bawlhhlawh paih man chu a paihtute'n an dawng tawh lo a ni.
AMC mayor Lalrinenga Sailo chuan Vanglaini zawhna chhangin, bawlhhlawh paihna man tur sum chu Public Finance Management System (PFMS)-ah a luh phawt a ngaih avangin a kal zung zung thei lo tih a sawi a; local council-te account-ah nimin khan a luh a beisei thu a sawi.
Lalrinenga Sailo chuan, bawlhhlawh paihna man tur sum chu 15th Finance Commission aṭanga rawn kal a ni tih sawiin, "Tun hma chuan awlsam takin kan inpe mai a, tunah erawh chuan 15th Finance Commission-in sum a rawn pekte hi PFMS-ah a luh phawt a ngai a, a buaithlak ta deuh," a ti.
Aizawl Garbage Vehicle Owners Association (AGVOA) president R Lalṭhazuala chuan, bawlhhlawh an paih man chu an la dawng lo tih a sawi a, "AMC lamin min la pe lo. AMC-in local council-ah an pe ang a, local council-te'n min pek hun tur kan hre lo. Hei vang hian thu mûm kan la nei lo a, kan la ngaihtuah ang," a ti a; sum dawn loh vanga bawlhhlawh paih an tum chu an kaltlangpui dawn leh dawn loh a la chian loh thu a sawi.
Aizawl Mayor chuan, bawlhhlawh paihna man tur sum tuna an dawn chu state sorkarin hun eng emaw chen a hrên avangin state sorkarin penalty an châwi dawn thu a sawi a, "15th Finance Commission aṭanga sum rawn kal hi ni 10 chhungin state sorkarin a rawn pe chhuak ngei ngei tur a ni a, a pek loh chuan penalty a chawi a ngai. Tun ṭumah pawh hian penalty a chawi ngei a rinawm. Tun hma pawhin state sorkarin penalty a lo chawi fo tawh," a ti.
Thu dawn danin, Aizawl khawpuia bawlhlawh paih lirthei hman man atan AMC chuan kum khatah cheng nuai 500 vel a sêng ṭhin a; AMC hian bawlhhlawh paih man zawng zawng aṭanga 60% a tum a, 40% chu local council-te'n an tum thung. Aizawlah local council 85 a awm mek a, local council-te hian bawlhhlawh paih man an tum ve tur chu veng mipuiah an khawn khawm ṭhin a ni.