Mizoramah thla 9 chhungin lirthei 18,660 ziah luh a ni
Mizoram Transport department chuan December 31, 2023 thleng khan lirthei 3,01,680 an ziak lut (register) tawh a; sorkar kum kal mekah April-December, 2023, thla kua chhungin lirthei 18,660 an ziak lut a, chu'ng zinga 13,650 chu two wheeler niin a tam ber.
Transport department-in December 31, 2023 thlenga an chhinchhiah danin, lirthei ziah luh tawh zinga tam ber chu two wheeler niin, 2,05,636 a ni a, lirthei ziah luh tawh zawng zawng 3,01,680 aṭangin 68.16% a tling. A dawttu chu car niin, 50,942 a ni a, lirthei ziah luh tawh zat aṭangin 16.89% a ni.
Sumdawnna lirthei, bungraw phur chi 21,858 (7.25%) ziah luh a ni tawh a; three wheeler (auto-rickshaw) 6,026 (2%), motor cab (taxi) 5,859 (1.94%), two wheeler taxi/rental 3,551 (1.18%), maxicab 2,399 (0.80%) leh bus 590 (0.20%) ziah luh a ni tawh.
Transport department tarlan danin, sorkar kum kal mekah thla kua - nikum April 1 aṭanga December 31 chhungin lirthei chi hrang hrang 18,660 ziah luh a ni a; sorkar kum hmasa April 1, 2022 - March 31, 2023 (thla 12) chhungin lirthei 27,143 ziah luh a ni thung.
April 1 - December 31, 2023 chhunga lirthei ziah luh 18,660 zingah two wheeler tam berin, 13,650 (73.15%) a ni a; ziah luh tam zual dangte chu - car 3,260, sumdawnna lirthei bungraw phur chi 999, three wheeler (auto-rickshaw) 248, two wheeler taxi/rental 234, motor cab (taxi) 57, maxicab paruk leh bus pahnihte a ni.