India rama khawpui fai intihsiaknaah Lunglei leh Aizawlin lawmman an dawng

India rama khawpui fai inelna, Swachh Survekshan 2023-ah nimin khan New Delhi-ah lawmman sem a ni a; Lunglei khawpuiin Clean City in the North East Zone Award (below 1,00,000 population) a dawng a, Aizawl khawpuiin Clean City Award a dawng bawk.

Khawpui fai intihsiak-naa lawmmante hi Bharat Mandapam Plenary Hall, Pragati Maidan-ah sem a ni a, result chu President Droupadi Murmu-i'n a tlangzarh.

Inelnaah hian Lunglei khawpuiin Clean City in the NE Zone Award (mi 1,00,000 aia tlem chenna khawpui) a dawng a, Lunglei aiawhin Lunglei Municipal Council chief executive officer R Vanlalsawta'n lawm­man a dawng.

Aizawl khawpuiin Clean City Award a dawng a, Aizawl aiawhin Urban Development and Poverty Alleviation department director Dr Andrew H Vanlaldika'n a dawng. Lawmman semnaah hian Mizoram aṭangin UDPA department leh LMC aṭangin official ṭhenkhat an tel bawk.

Swachh Survekshan Award hi Ministry of Housing & Urban Affairs buatsaih a ni a, third party monitoring team-in an endikna aṭangin result siam a ni ṭhin. India khawpui (city leh urban town) zawng zawng endik a ni a, Survekshan 2023-ah hian India rama khawpui 4,477 an tel.

Swachh Survekshan 2023-ah hian Madhya Pradesh state-a khawpui lian ber Indore leh Surat, Gujarat chu pakhatna an ni a, Navi Mumbai chu pathumna a ni. Indore hi a záwnin kum sarih chhung pakhatna a ni tawh a, kuminah hian Surat nen pakhatna an ni.