Assam Rifles leh Excise dept. ten 2023-ah heroin kg. 112.559 an man

Assam Rifles leh Excise & Narcotics department chuan kum 2023 chhung khan Mizoramah heroin 112.559 an man. AR hian nikum chhung khan Mizoramah ruihhlo chi hrang hrang cheng vbc. 956.65 hù leh dan loa ram dang aṭanga kuhva rah lak luh cheng vbc. 47.31 hù an man.

Assam Rifles aṭanga thu dawn danin, AR hian January - December, 2023 chhung khan ruihhlo chi ruk manin, cheng vbc. 956.65 hù a tling a; ruihhlo man zingah heroin tam berin kg. 33.20 an man a, Rs 5,46,62,99,200 hù a ni. Methamphetamine mûm 12,17,524 an man a, Rs 3,39,36,61,800 hù a tling.

Mizoram sorkara Excise & Narcotics department chuan kum 2023 chhung khan heroin kg. 79.359 an man a, methamphetamine kg. 113.222 an man bawk.

Excise & Narcotics department leh Assam Rifles ten kum 2023 chhunga heroin an man zawng zawng chu kg. 112.559 a ni.

Assam Rifles chuan nikum chhung khan opium kg. 3 (Rs 1,80,000 hù), ganja kg 25.950 (Rs 18,48,900 hù), poppy seed kg. 20.540 (Rs 53,04,000 hù) leh Troprolidine mûm 98,000 (Rs 9,80,00,000 hù) AR sipaite chuan an man bawk.

Nikum chhung khan Assam Rifles-te'n Myanmar aṭanga dan loa lak luh kuhva rah quintal 681.03 an man a, Rs 47,31,05,500 hù a tling. Ram dang meizial báwmpui (case) 4,134 manin, Rs 47,79,50,315 hù a ni a; ram dang zu báwm (case) 2,953 an man tawh a, Rs 1,26,77,416 hù a ni.