Mizorama Eri Project endik a ni

Sericulture department-in Eri Project an kalpui mekte chu Central Silk Board (CSB) lama mithiamte leh Mizoram Sericulture department hotute'n tun kar Thawhṭanni aṭang khan an enfiah.

Eri Project endiktute chu hlawm hnihah inṭhenin, chhim lam - Lunglei, Hnahthial leh Serchhip district-te chu CSB scientist BN Choudhury leh Sericulture department-a mithiam Dr Lalthlamuana Pachuau ten an endik a; khawchhak lam - Champhai, Khawzawl leh Saitual district-te chu Sericulture deputy director B Lalchhuana leh CSB, Guwahati assistant secretary Nagest ten an endik thung.

Endiktute hian Eri project hnuaia ṭanpuina dawngtute hmalakna hmun an tlawh a, an hmalak dante an enfiah. Project kalpui tawh chinah hma an la ṭha thawkhatah an ngai a, dik leh ṭha taka an ṭanpuina dawnte hmang zel turin an fuih bawk.

Verification report hi project chhunzawm zelna tur sum sorkar laipui aṭanga lo kal turah a pawimawh avangin Mizoram Sericulture department chu theihtawpin an lo inbuatsaih a; Eri project bakah Muga project pawh kuminah hian kalpui turin an inbuatsaih mek a ni.