Chief Minister-in Jeremy thingpui a inpui

Chief minister Lalduhoma chuan nimin khan a banglaah rit chàwi chak Jeremy Lalrinnunga thingpui a inpui a, Mizoram leh India tihmingṭhatu ni zel tura bei chhunzawm turin a fuih.

Arunachal Pradesh khawpui Itanagar-a December 28, 2023 aṭanga January 7, 2024 chhunga Indian Weightlifting Federation, Youth, Junior leh Senior National Weightlifting Championships neih zawh tâkah Jeremy Lalrinnunga hi Senior National Weightlifting Championships mipa huangah Best Lifter atan thlan a ni a, Best Lifter-a thlan a ni vawi hnihna a ni.

Lalduhoma chuan, Mizo ṭhalai la naupang tak, infiamna lama khawvel hmelhriat Mizoramin a nei chu lawmawm a tih thu sawiin, "Mizoram leh India tihmingṭhatu ni zel tura bei chhunzawm turin ka ngen che a ni," a ti a, lawmpuina leh duhsakna a hlan.

Jeremy Lalrinnunga pawhin inelna lian tham awm tur atan inbuatsaihna a neih mek dan leh hlawhtlinna a chan tawhte Chief Minister a hrilh.

Chief Minister hi IPR minister Dr Vanlalthlana'n a ṭawiawm a; Jeremy Lalrinnunga hi a pa Lalneihtluanga leh Mizoram Weightlifting Association hruaitute'n an ṭawiawm a ni.