Dragon fruit hmun kawng siam turin ngen

Thenzawl Dragon Fruits Growers & Marketing Society hruaitute chuan January 10, Nilaini khan chief minister Lalduhoma a pisaah an kâwm a; dragon fruit an chìnna hmun panna kawng siam ṭhatsak turin an ngen.

Society hruaitute chuan Chief Minister hnenah hian hmun zau takah a hlâwm (cluster)-a dragon fruit an chìn thu an sawi a; an hmun panna kawng chu SEDP aṭanga thawh a nih thu te, kawngpui hmun ṭhenkhat chhuk chho zual laiah lirthei rit phur a kal theih loh thu te, hmun ṭhenkhata kawng zîm zual lai a awm thu te, huan awm khawm (zaù) inkalpawhna kawng siamṭhat ngai eng emaw zat a awm thute an hrilh.

CM Lalduhoma chuan an dilnate chu tihhlawhtlinsak a tum tur thu leh an hmunhma pawh tlawh a tum thute a lo hrilh a ni.

Thenzawl Dragon Fruits Growers & Marketing Society-ah hian member chhungkaw 69 leh mimal pathum an awm a, dragon fruit 36,000 phunin bul an ṭan a, a hnuah kung eng emaw zat an phun belh leh tawh bawk.