Aizawlah NER Trek 2024 ṭan a ni

North Eastern Region Trek 2024 chu January 10, Nilaini khan State Training Centre, Tanhrilah ṭan a ni. Trek-ah hian hmarchhak state-te bakah state dang aṭangin mi eng emaw zat an tel a, January 17, 2024-ah khâr a ni ang.

NER Trek 2024-ah hian hmarchhak state-te bakah, Rajasthan, Odisha, Bihar, Jharkhand leh West Bengal aṭangin an tel a, an vaiin mi (NCC cadet) 300 vel an ni.

Trek hian a tum chu - state hrang hranga cadet-te an inpawh theih nan te, hnam nunphung an inhriat tawna an inzah tawn theih nan te, mahni inrintâwkna an neih theih nan te, adventure rilru - thil zawn chhuah leh zawhna zawh duhna an neih theih nan te, hnam inpumkhat nante a ni. Trek chhungin state hrang hrang aṭanga telte'n presentation an nei dawn a, cultural programme neih a ni bawk ang.