Hachhekah MNF sorkar hnathawh a lang chhuak mek - Robert Romawia

Hachhek bialtu MLA Robert Romawia Royte chuan January 4 aṭanga nimin thleng khan a bial chhunga khaw hrang hrang a fang a, Hachhek bialah MNF sorkar hmalakna leh hnathawh a lang chhuak mek niin a sawi.

Robert Romawia Royte chuan, MNF sorkar laiin Hachhek bial chu opposition bial ni mahse nasa taka hma an lakna a nih thu sawiin, "He bial tan hian sorkar hmasain ruahmanna kan siam angin hna kal mekte bakah hna thar tam tak thawh zel a ni," a ti.

Bairabi leh Zamuang inkar kawng cheng nuai 3,000 hmanga siam tur leh Luimawi leh Thinghlun inkar kawng cheng nuai 910 hmanga siam turte chu pawisa hmuh tawh a nih thu sawiin MLA chuan, "Sport leh education sector-ah pawh hmalak mekna tam tak Hachhek bialah chhunzawm zel a ni ang," a ti a; Sotapa khua leh Belkhai khuaa

lirthei a luhna tur project - Sotapa tan cheng nuai 200 leh Belkhai tan nuai 375 bakah, cheng nuai 500 hmangin Zamuang-Hriphaw kawng thawm ṭhat mek a nih thu a sawi.

Robert Romawia hian Mizoram leh Assam inrina Mitdel lui leh Kolalian khuaa police duty-te a tlawh a, chaw an eikhawmna tur sum pein, ruihhlo laka fimkhur turin a chah.

Hachhek MLA hi khaw hrang hrangah khawtlang hruaitute'n an lo kâwm a; Hachhek bial hmasawn nan theihtawp chhuah a tum thu sawiin, amah ṭawiawm turin bial mipui leh pawl hrang hrang a sáwm a ni.