Bio-resources chungchang sawiho

Mizoram Science, Technology & Innovation Council (MISTIC) leh Institute for Bio-resources and Sustainable Development (IBSD), Mizoram Centre-te chuan nimin khan 'Sustainable utilisation of bio-resources for socio-economic development of Mizoram' tih thupui hmangin Mizorama bio-resource-te ṭangkai zawka hman dan tur an sawiho.

Sawihona hi Planning & Programme Implementation secretary Dr C Vanlalramsanga'n a kaihruai a, IBSD director Prof. Pulok K Mukherjee-a'n online-in a chhim. Scientist-E Dr K Jeyaram chuan IBSD hnathawh hrang hrang leh Mizoram Centre bika an hnathawhte a sawifiah a ni.

Science & Technology-a chief scientific officer Dr RK Lallianthanga'n Science & Technology department hmalakin Bio­resources Centre din tura hmalak mek a nih thu leh, Department of Biotechno­logy, New Delhi-ah project proposal thehluh a nih thu a sawi bawk.

Meeting-ah hian EFCC, Horticulture, Agriculture, Science & Technology department aiawh te, zirna-ina biotechnology lam aiawh te leh a kaihhnawih hrang hrang aiawhte an tel a ni.