Checkgate-a pawisa khawna puh mi pahnih suspend, mi paruk transfer

Vairengte Police checkgate-a hnam dang hnen aṭanga dan loa pawisa la ṭhina puh police officer pahnih chu chawlhtir (suspend) an ni a, constable panga sawn chhuah (transfer) an ni. Puh an nihna hi chhui chian a ni dawn.

Vanglaini thu dawn danin, Vairengte Police checkgate-ah hian January 5, 2024 khan duty-te'n hnam dang truck driver hnen aṭangin pawisa an la nia hriat a ni a, hei vang hian hemi nía checkgate-a police duty sub-inspector C Vanlalnghakmawia leh assistant sub-inspector Mary Rosangpuii te chu suspend an ni. Constable paruk chu district dangah sawn an ni bawk.

Police suspend leh transfer tâkte puh an nihna hi a dik ngei em tih chhui chian a ni dawn a, hemi rual hian suspend belh ngai an awm em tih pawh chhui nghal a ni ang.

Tarlan tawh angin, Home Secretary chuan January 4, 2024 khan office memorandum tichhuakin, police checkgate-a danin a phût ni lo pawisa khawn leh pawisa late report-na tur a tarlang.

Home Secretary chuan, police checkgate hrang hrang - Vairengte, Zokhawthar, Kanhmun, Medillichera, Champhai Khankawn, Saiphai, Phaisen, Bairabi leh New Kawnpuia duty-te'n danin a phût bak pawisa an khawn ṭhin tih hriat a nih thu a tarlang a, "Hei hi Mizoram sorkar chuan a pawm thei lo. Hetiang lo ti ṭhinte chu sim nghal tura hriattir an ni," a ti.

Danin a phût bak pawisa khawn leh pe hmu leh hriate chu thuneitute hnenah hriattir turin Home Secretary chuan a ngen a; district SP-te chu an huam chhunga checkgate-a report thlenna tur Mizo, English leh Hindi-a tàrtir vek turin a hriattir bawk.

Dan loa pawisa late hriattirna tur chu phone number - 0389 2336028, mobile phone number 7005609849 leh email mzhomedeptt@gmail-ahte a ni a; phone call, whatsapp, SMS leh email hmangin a thehluh theih. Dan bawhchhia report lutte buaipui turin Home department under secretary Zahmingthanga ruat a ni.