Red Ribbon National Quiz-ah Mizo zirlaite pakhatna an ni

Red Ribbon National Quiz Competition, Jaipur, Rajasthan-a nimina neihah Mizoram aṭanga tel Presbyterian English School, Republic Veng zirlai pahnihte chu pakhatna an ni a, lawmmanah Rs 1,00,000 an dawng.

National Quiz Competition-a pakhatna ni tate chu Zonunsangi, Class-VIII, d/o H Zahmingthanga, Republic Vengthlang leh Janet Malsawmpuii, Class-IX, d/o Lalrintluanga Ralte, College Veng, Aizawlte an ni. Intihsiak hi The Rajasthan International Centre, Jaipur-ah neih a ni a, Mizo zirlaite hi an zirtirtu Zonunpuii Khawl­hring leh Mizoram State AIDS Control Society aṭangin Joseph Lalnunmawia ten an hruai.

Intihsiakah hian India ram hlawm (region) palia ṭhena regional champion ṭheuh (state pali) an tel a, North East Region aiawha tel Mizo zirlaite hian point 100 an hmu. Zone dang ṭanga telte'n point an hmuh dan chu - Telangana (Central Region)-in point 60, Uttarakhand (Northern Region)-in point 55 leh Puducherry (West & South Region)-in point 55 a ni.

Red Ribbon Quiz hi National AIDS Control Organization (NACO) leh Ministry of Health & Family Welfare buatsaih a ni a, Mizoramah chuan MSACS-in an buaipui. Nikum khan ṭan niin, district level intihsiakin bul ṭan a ni a, district-a pakhatna ṭheuhte chu state level-ah an intihsiak. State level-a pakhatnate chu regional level-ah state dang zirlaite nen an inel leh a, regional level-a champion-te chu national level-ah an intihsiak leh a ni.

District, state leh regional level-ahte hian PES, Republic Veng zirlai Zonunsangi leh Janet Malsawmpuii te hi pakhatna an ni chho zel a, national level intihsiakah tel lehin, India ram pumah pakhatna an ni ta a ni.

Presbyterian English School, Republic Veng hi kum 2000-ah din a ni a, KG-1 aṭanga pawl 10 thleng zir theihna niin, zirlai 686 an awm mek a ni.