Home Minister-in male barrack a hawng

Home minister Lalchamliana chuan nimin khan Kolasib District Jail-ah mi 32 awm theihna tur male barrack a hawng a; jail-a thawkte leh tángte a kâwm nghal.

Lalchamliana chuan, tángte chu insiamṭhatna hmun atan jail hmang ṭangkai tura chahin, "Mizoram sorkarin jail-te hi tángte hremna hmun atan ni loin, an insiamṭhat theihna tur leh eizawnna tlak thiamthil an zir chhuah theihna tura a buatsaih a ni," a ti a; jail tángte'n mamawh hrang hrang an lo thlente chu a ṭul anga bawhzui a tum thu a hrilh.

Male barrack hawnna inkhawm kaihruaitu Maria CT Zuali, IG (Pri­sons) chuan, district jail-a tángte tan sorkar department dangte nen thawk­hoin eizawnna atana ṭang­kai tur zirtirna kalpui a nih tur thu a sawi a; SIRD nen ṭangkawpin zirtirna pe turin ruahmanna a kal mek thu a sawi bawk. Kolasib District Jail hi mi 114 tân theihna tura sak niin, mipa 98 leh hmei­chhia 16 awm theihna hmun tura duan a ni a; táng 133 an awm mek a, chu'ng zing pali chu hmei­chhia an ni. Rûkrûk vanga táng tam berin, mi 56 an awm a, NDPS Act hnuaia man mi 29 an awm a ni.

Home Minister hian Kolasib-a Fire & Emergency Service station a tlawh bawk a, an hnathawh dan leh harsatna awmte sawipuiin, hmalak dan turte rêl a ni. Leading fireman VL Ruala tarlan danin, kum 2019 chhung­in Kolasib khaw chhung­ah in kâng pahnih leh ram kâng pakua ṭhelhin an che chhuak a, motor lian gas leh POL phur chesual ven ngai an zui ṭhin bawk. Kolasib Fire Station-ah hian kâng ṭhelh motor tui litre 3,500 leh litre 2,800 phur thei an nei a, tui litre 50,000 dah khawl theihna tuizém an nei bawk a ni. Minister Lalchamliana hi Kolasib SP Vanlalfaka Ralte leh Fire & Emergency Services SP Ruatsanga Ralte ten an ṭawiawm.