KHAWTHLIR

KTP-in thisen pe

KṬP, Saikhamakawn Branch chuan an din champha pualin nimin khan an kohhran hall-ah thisen pek an huaihawt a; Synod Hospital tan thisen unit 34 an pe a, petute mipa 30 leh hmeichhia pali an ni.

Khualbûk hawng

Falkawna Synod Khualbûk sak thar chu January 10, 2024 khan Synod moderator Rev. R Vanlalnghaka'n Pathian hnenah hlanin a hawng. State Referral Hospital pantu an pun zel avangin Synod chuan Falkawna an ramah Rs 3,47,49,000 sêngin khualbûk an sa a, khualbûk bakah chaplain quarters a awm a ni.

Meth man

Excise & Narcotics dept. leh 42nd Assam Rifles thawk dun chuan January 11, Ningani chawhnu dar 3 khan Zokhawthar kawngah methamphetamine mûm 2,02,000 (kg. 22.220) an man a, a neitua puh Vanliankhuma (25) s/o Lalneihthanga, Saikhumphai, Champhai district nia inchhál an man bawk.

Minister-in telpui

Sorkar laipuia Health & Family Welfare minister Dr Mansukh Mandaviya chuan nimin khan North East Region Health Infrastructure Projects a hawng. Hawnna inkhawmah hian Health minister Lalrinpuii chu RIPANS aṭangin biak hmuhna kaltlangin a tel a; Health department leh RIPANS hotute'n an ṭawiawm a ni.

Pisa luah lut

Lunglei district High Powered Committee (HPC) vice chairman thar V Malsawmtluanga, MLA chuan nimin khan a pisa a luah lut. V Malsawmtluanga bakah Lunglei Municipal Council chairman Lalzuithanga leh HPC vice chairman kal chhuak Lawmawma Tochhawng ten thu an sawi a; LMC councillor-te leh pawl hruaitute an tel a ni.

PMEGP inzirtir

KVIC State Office chuan nimin khan Kolasib Venglaia City Hall-ah PMEGP chungchang inhrilhfiahna an buatsaih a, KVIC assistant director Josephine Zodinpuii'n a hmanpui. District PMEGP Awareness-ah hian DIC general manager C Thangkima, KVIB aiawh Lallawmsangi leh MRB RSETI aṭangin director C Laldampuia ten thu an sawi a; PMEGP loan la tawh hlawhtling mi pathumin an chanchin an sawi bawk.

Induction service

Naktuk Pathianni, January 14 hian chawhnu inkhawmah Mizoram Synod hnuaia pastor-te leh probationary pastor insawn, awmna thara awm turte lak luhna inkhawm, induction service neih a ni dawn. Kumin kum tirah hian induction service neihpui tur Mizoram Synod hnuaia thawk pastor 86 leh pro. pastor 23 an awm a ni.

Minister-in tlawh

AH&Vety minister C Lalsawivunga chuan nimin khan AH&Vety directorate a tlawh. Minister chuan, "Chhungkua angin theihtawp chhuahin ṭan kan la chho ang a, hma lamah mipuiin beiseina sang tak nen min en tih hre thar leh ila, min beiseinate tihlawhtling turin ṭhahnemngai takin thawh a ṭul," a ti a; Vety department thawktute chu an thiamna leh finnate kut hnathawktute tan kal se a duh thu a sawi.